«La Scuntrada» Tinizong ha in nov president

L’uniun da promoturs «La Scuntrada» a Tinizong ha in nov president. Heinz Götz surpiglia il presidi da Meinrad Poltera che daventa vicepresident. L’uniun maina l’ustaria e butia da Tinizong, ch’è vegnida finanziada da l’anteriura vischnanca Tinizong-Rona.

L'ustaria e la butia dadens. Bild in Lightbox öffnen.

Legenda da maletgs: L'ustaria e la butia dadens. RTR, Federico Belotti

Sco quai che l’uniun «La Scuntrada» scriva en ina brev a ses commembers, saja plinavant vegnì elegì Hans-Peter Hübscher sco actuar. Tant il nov president sco era il nov actuar sajan possessurs da segundas abitaziuns en il Surses.

Nov'entschatta gartegiada

Plinavant scriva l’uniun da promoturs, che l’ustaria marschia fitg bain cun ils novs ustiers Carlo Uffer e Lorraine Meier. Era la butia haja gì intginas midadas, uschia dettia ussa dapli products da la regiun.

Ustier vegl ha stuì ir

L’enviern passà aveva l’uniun da promoturs desditg il contract cun Uwe Schlomann e sia partenaria ch'avevan cumenzà il fanadur 2016. L'argumentaziun da lura: L'ustier n’haja betg ademplì las pretensiuns dal contract d’affittaziun.