Siglir tar il cuntegn

Header

cuntegn

Grischun Central «Nus essan dependents da nossa societad»

Betg mo en Turgovia, mabain er en il Grischun datti maltractament d'animals. Dentant dettia plitost paucs cas, declera il substitut dal veterinari chantunal, Giochen Bearth.

audio
Bunura: La situaziun da tractament d'animals en il Grischun
ord Actualitad dals 17.08.2017.
laschar ir. Durada: 4 minutas 10 Secundas.

Ina garanzia absoluta ch'i na schabegia betg insatge illegal en in u l' auter lieu, na possia el betg dar, declera Giochen Bearth. Tar ils manaschis purils sajan 90% manads correct, 5% dals manaschis sajan critics, e lura dettia ina pitschna cifra da manaschis nua ch'els stoppian controllar in zic pli intensiv.

Ina controlla è dentant adina be punctuala.
Autur: Giochen Bearth substitut dal veterinari chantunal

Quai veglia dir ch'els vesian per exempel la mesemna avantmezdi in muvel. Els na possian dentant betg savair tge ch'igl è stà il di avant, e tge che capitia il proxim di, manegia Giochen Bearth. Els fetschian controllas annunziadas e talas betg annunziadas.

Persunas uffizialas ston annunziar

Dasper ils manaschis purils giaja era per animals da chasa. Tar tals na saja betg pussaivel d'avair ina survista, manegia Bearth. Perquai sajan las annunzias da la populaziun impurtantas. Persunas uffizialas sco veterinaris, inseminaders, suprastants communals u ils presidents communals èn obligads d'annunziar indizis per maltractament d'animals. Savens veglian las persunas restar anonimas. Quests cas sajan lura fitg grevs da tractar, di Bearth. «Nus essan dependents da nossa societad. Da l'autra vart avain nus er annunzias ch'èn absolut ridiculas.».

Colliaziun cun l'agricultura manca

Quai saja surtut perquai che la colliaziun cun l'agricultura manchia a bleras persunas. Per exempel hajan persunas er gia annunzià ch'ina nursa stoppia star en la plievgia u sin ina spunda taissa e pateschia perquai, accentuescha Bearth.

RR actualitad 07:00

Artitgels legids il pli savens