Siglir tar il cuntegn

Header

cuntegn

Grischun Central Panaduz: grev accident sin l’A13

Tar ina collisiun frontala sin l’A13 en vischinanza da Panaduz èn vegnidas blessadas il venderdi suentermezdi 6 persunas – 5 dad ellas grevamain.

In automobilist da 72 onns viagiava cun ses Honda cun numer songagliais curt avant las 15:00 en direcziun nord. Curt suenter la colliaziun da la via cun Panaduz è capitada ina collisiun frontala cun in VW cun numer grischun, guidà dad in um da 68 onns. Tut las 6 persunas en ils autos èn vegnidas blessadas – 5 dad ellas grevamain. 2 blessads èn vegnids transportads cun la Rega en ils ospitals da Cuira e Turitg. 3 ambulanzas han manà ils ulteriurs blessads a Cuira e Tusaun.

Autos sin l'A13 stattan salda. Davovart las turs dal City West.
Legenda: L'accident ha causà disturbis da traffic considerabels fin en la regiun da Cuira. RTR, V.Schmed

Co ch’il accident è succedì n’è anc betg enconuschent. Curt avant l’accident ha dentant in auto evità la situaziun ed è passà enavant vers sid. Perquai supplica la polizia chantunala a la persuna che ha guidà quel auto u ad autras persunas che han fat observaziuns da s’annunziar. La procura publica e la polizia chantunala examineschan il cas.

Durant las lavurs da salvament è vegnì svià il traffic. Era sche la polizia ha pudì dar liber curt avant las 18:00 danovamain la via vers sid haja dat en la regiun da la Tumleastga e da Cuira disturbis considerabels dal traffic.

RR novitads 20:00

Artitgels legids il pli savens