Siglir tar il cuntegn

Header

cuntegn

Grischun Central Pendicularas da Spleia davant nov’entschatta

Las Pendicularas da Spleia Tambo SA han in nov cussegl d’administraziun. Quel è vegnì elegì venderdi da la radunanza generala extraordinaria a Spleia. Il nov cussegl d’administraziun vul ir cun ina nova strategia en l’avegnir.

Vista sin la staziun da val ils 28. d'avrigl, il di da la radunanza generala extraordinaria.
Legenda: Vista sin la staziun da val ils 28. d'avrigl, il di da la radunanza generala extraordinaria. RTR, Federico Belotti

Il nov president dal cussegl d’administraziun è Franco Quinter da Brinzauls. Novs commembers dal cussegl d’administraziun èn Ivo Frei da Farschno e Karl Liechti da Widnau. L’elecziun è stada necessaria perquai che trais commembers dal cussegl d’administraziun èn sa retratgs il schaner da quest onn pervi d’ina dispita cun la vischnanca da Spleia. Quella na gieva betg d’accord cun la strategia 2025, che preveseva tranter auter in augment dal chapital d’aczias cun agid da las vischnancas.

Strategeia 2025 è istorgia

Novas variantas èn sin maisa. Ina nova gruppa d’investiders duess ussa manar enavant las pendicularas da Spleia, ha ditg Franco Quinter, il nov president dal cussegl d’administraziun da las Pendicularas da Spleia Tambo SA. I dettia investiders, che sajan pronts da manar la fatschenta en l’avegnir e da procurar per letgs chauds. La strategia 2025 ch'era vegnida preschentda dal cussegl d'administraziun vegl na saja betg la dretga via.

Bler chapital ester

Las pendicularas Spleia-Tambo SA èn deficitaras ed han il mument in chapital ester da 6,5 milliuns francs. Vinavant n’èn las pendicularas da Spleia betg rentablas ed ils ultims onns èn las svieutas sa reducidas cuntinuadamain. Uss vul il cussegl d’administraziun realisar in tagl dals debits tar las bancas. Uschia dettia quai trais variantas, ina sanaziun dals debits ni che plirs dals debits vegnan relaschads ni la terza varianta il concurs. Pir cura che la basa finanziala saja reglada possian ins ir vida projects novs e novas strategias, ha accentuà Franco Quinter.

RR novitads 17:00

video
Pendicularas Spleia-Tambo
Or da Telesguard dals 28.04.2017.
laschar ir. Durada: 2 minutas 41 Secundas.

Artitgels legids il pli savens