La radunanza communala d’Andeer ha approvà mesemna saira ina revisiun parziala da la planisaziun d’utilisaziun per la chava da crappa «Cuolmet». Quai en vista al basegn d’ina deponia dal tip B per substanzas inertas.
En la chava «Cuolmet» utilisescha la vischnaunca dapi decennis crappa. Cun la midada d'utilisaziun èsi uss era pussaivel d'emplenir ina part da la cava cun fin 300'000 cubics material schuber da bajegiar. Ina ulteriura part vegn duvrada per deponer il material che vegn or dals tunnels da segirtad che vegnan actualmain bajegiads per la A13.
En pli ha la vischnanca d’Andeer concedì in credit da 498'000 francs per sanar pliras vias ch’èn vegnidas donnegiadas tras malauras. Er ha il suveran approvà in quint annual da l’onn passà. Quel serra cun in surpli da bunamain 59'000 francs.
