Rona: Buna finiziun dals «Nordic Games»

Malgrà l'aura da plievgia, èn ils organisaturs dal final dals «Helvetia Nordic Games» da la fin d’emna cuntents. I haja dà blers cumpliments e nagin haja reclamà, uschia il facit da Giancarlo Torriani, il president dal comité d’organisaziun.

Radund 525 juniors dal passlung, davent da las classas U8 enfin U16 èn partids a Rona en differentas disciplinas. Malgrà l’aura da plievgia sajan las loipas stadas en ina buna cundiziun. Perquai ch’ins ha stuì preparar ils davos dis las loipas cun blera lavur manuala, quinta Torriani da pudair tegnair en mo stgars il preventiv da bun 70’000 francs. «L’idea fiss atgnamain stada, da pudair investir il gudogn per il passlung en il Surses, ma pervi da la lavur supplementara da preparar las loipas vegn probabel a restar nagut pli».

Giavisch per ulteriuras cursas

En l’avegnir duai puspè ina giada dar cursas da passlung pli grondas, forsa en dus fin trais onns ha ditg Torriani. El spera, ch’il center da passlung a Rona possia en l’avegnir daventar anc pli enconuschent, grazia a questas occurrenzas. Il november da l’onn passà ha la radunanza communala da Surses approvà in credit da bun 1,3 milliuns francs per il traject e l’infrastructura dal center da passlung a Rona.

Laschar ir video «Rona – Dus fargliuns da Sedrun èn sa participads als Helvetic Nordic Games»

Rona – Dus fargliuns da Sedrun èn sa participads als Helvetic...

3:15 min, Telesguard dals 20.3.2017

RR actualitad 06:00