Suenter San Murezzan vul er Tavau daventar Host City per ils gieus olimpics d'enviern dal 2016. Sco il mastral da Tavau Tarzisius Caviezel ha ditg sin dumonda, saja la suprastanza da principi persuenter. Ins stoppia dentant anc sclerir ils detagls.
La suprastanza communala da San Murezzan ha decidì da star a disposiziun. Las cundiziuns dal comité olimpic internaziunal stoppian dentant esser finanzialmain purtablas, uschia il president communal Sigi Asprion al schurnal regiunal da Radio SRF.
...ed era il pievel sto esser d'accord.
La fin finala decida la regenza ensemen cun Swiss Olympic, tgi che daventa lura propi il candidat definitiv per la Host City. Dentant quai na fetschia anc nagina prescha, er sch'il dossier per la candidatura vegn gia inoltrà en paucs dis, ils 15 da december, a Swiss Olympic. Sco cusseglier guvernativ Jon Domenic Parolini di, saja fitg probabel ch'il dossier vegnia inoltrà cun differentas variantas.
NA da Cuira
Cuira na statt betg a disposiziun. Quai ha la suprastanza da la chapitala grischuna decidì. Sco il president Urs Marti ha ditg sin dumonda dad RTR, haja el memia paucas infurmaziuns davart ils risicos finanzials.
Host City sto esser in lieu enconuschent sin l'entir mund e quai èn San Murezzan u Tavau.
La citad da Turitg aveva gia desditg avant mais ses interess da daventar Host City.
RR novitads 15:00++