Il persunal en la gastronomia è confruntà cun differentas sfidas. Per exempel n'han blers emploiads da stagiun betg la segirtad dad ina paja sur l'entir onn. Suenter ina stagiun auta èn blers relaschads en la dischoccupaziun. Quai vul in project da la HTW Cuira midar.
Ir a lavurar empè dad ir a bullar
Grazia al project duain collavuraturs da la gastronomia savair lavurar sur l'entir onn, senza interrupziun tranter las stagiuns autas. Ils hotel Grischuns na ston uschia betg laschar enavos senza lavur il persunal suenter la stagiun auta d'enviern. Els pon trametter lur collavuraturs en il Tessin. Là duain els lura lavurar durant la stagiun auta da stad. Cura che la stagiun auta en las destinaziuns d'enviern en il Grischun cumenza, è il persunal lura puspè enavos. La perioda da temps ch'il persunal è senza lavur fiss tenor quai model pia sin il pli in tochen dus mais, pia da mez october fin mez december. Quai è lura, cu ni il Tessin ni il Grischun dovran bler persunal.
Fasa da pilot
Per il mument – en la fasa da pilot – sa participeschan 22 hotels e circa 200 collavuraturs vid il project. Fin il 2018 duai il model vegnir testà. Puncts che chaschunan fin lura anc problems pon en quai temps vegnir schliads. Tar quels puncts sa tracti per exempel da la dumonda, tge hotel che survegn ils collavuraturs durant temps sco per exempel da Pasca, cura che omadus lieus dovran bler persunal. La finamira è dad integrar en ils proxims onns radund 500 manaschis da gastronomia en il project.
RTR Telesguard 17.40