Tenor il concern d'energia svizzer Axpo datti ina mancanza d'energia. Perquai ponderescha l'Axpo da prolungar il mantegniment da l'ovra atomara Beznau 1, la pli veglia en Svizra. Planisà era oriundamain da chalar cun la producziun d'energia atomara enfin circa l'onn 2030.
L'ovra Beznau 1 è vegnida messa en funcziun l'onn 1969. A Beznau hai anc in'autra ovra atomara (Beznau 2). Quella è dentant in zic pli giuvna – il 1971 è ella vegnida activada. Ensemen produceschan quests dus reacturs avunda energia per circa 1,3 milliuns chasadas da quatter persunas.
Standards da segirezza betg sin il nov stan
Per il mument vegn sclerì sche la prolungaziun da l'ovra atomara è tecnicamain insumma pussaivla. Quai dependa da plirs facturs, per exempel sto vegnir examinà sche cumponentas centralas funcziunan anc. Ma er sch'i ha avunda persunal, furniturs e material d'arder.
Absoluta prioritad ha, tenor l'Axpo, dentant la segirezza. L'onn 2011 ha l'Inspecturat federal da la segirezza nucleara (ENSI) communitgà en in rapport, ch'intgins aspects da l'ovra atomara hajan basegns da vegnir megliurads. Auters aspects hajan dentant mussà in fitg bun nivel da segirezza. L'Axpo ha investà passa 2,5 milliuns francs ils onns passads per modernisar e mantegnair la segirezza da las duas ovras atomaras. Actualmain vegn examinà quant ch'i custass da mantegnair Beznau 1.
Critica cunter ils plans da l'Axpo
Tenor la fundaziun d'energia svizra (SES) saja l'ovra atomara lunsch davent dal standard da segirezza necessari. Er l'intransparenza da l'Axpo davart las duas ovras atomaras critigescha la SES. I saja pli segir, da betg centralisar l'entir provediment d'energia cun ovras atomaras che retiran il gas da la Russia.
La fundaziun d'energia svizra s'engascha per la promoziun d'energias regenerablas.