L'onn 2013 han Svizras e Svizzers approvà la revisiun da la planisaziun dal territori. Il 2018 ha il Cussegl grond mess sut tetg la lescha chantunala. La finamira; construir pli stretg per franar il surdiever dal terren. Memia grondas zonas da construir duain vegnir pli pitschnas e reservas existentas vegnir nizzegiadas meglier. Uss prest 10 onns suenter la decisiun dal suveran sa fatschentan vischnancas e chantun anc adina cun la realisaziun.
Il stan è fitg, fitg different. Da las 101 vischnancas han quatter fatg quai ch'è da far.
Cunzunt las vischnancas èn dumandadas en quai process. Radund 40 ulteriuras èn sin buna via, pli che la mesadad han dentant anc gnanc inoltrà il project da la preexaminaziun al chantun. Che tut cuzza uschè ditg ha er da far cun quai che suprastanzas en vischnancas pitschnas han pli paucas capacitads e savens er pli pauca expertisa ed er cun quai che divers uffizis chantunals èn cumpigliads. Quai fa ch'il process è complicà e stentus.
Igl è in pensum extrem complex. Igl è da quintar cun protestas e plants fin tar il Tribunal federal. I manca er persunal tar il chantun sco er tar ils biros da planisaziun.
Tenor el n'èsi perquai betg pussaivel da metter suttetg en tut las vischnancas la revisiun sin la fin da l'onn, uschia sco i vegn pretendì da la Confederaziun. I vegnia segiramain a cuzzar pli ditg, ins saja dentant vidlunder e fetschia il pussaivel.