L'uvestg emerità veglia vegnir sepulì a Ecône en il Vallais sin il santeri da la confraternitad tradiziunala da Pius X. El veglia ruassar en la vischinanza da l'uvestg Marcel Lefebvre, il fundatur da la confraternitad da Pius X. Cun questa confraternitad aveva Huonder ina relaziun stretga, el viveva dapi l'onn 2019 en l'institut Santa Maria a Wangs che vegn manà da la confraternitad Pius X. Detagls da la sepultura vegnian communitgadas da la confraternitad.
Davos discurs cun Huonder
La decisiun davart sia sepultura aveva Vitus Huonder gia communitgà a l'uvestgieu da Cuira il 2022. Durant ses davos dis ha l'uvestg emerità gì visitas da l'uvestg Joseph Maria Bonnemain. Sco che l'uvestgieu da Cuira communitgescha, hajan ins anc ina giada dumandà Vitus Huonder sch'el restia tar sia decisiun, da betg vulair vegnir sepulì a Cuira.
L’uvestg Joseph Maria Bonnemain avess preferì sche Vitus Huonder fiss vegnì sepulì a Cuira en il santeri avant la catedrala. Quai ha el raquintà en l'intervista cun RTR. Igl è ina veglia tradiziun ch’ils uvestgs da Cuira chattan lur ruaus perpeten en quest lieu d’onur.
Jau hai exprimì mias resalvas e mes arguments envers uvestg Vitus Huonder. Far squitsch sin ina persuna moribunda e vulair persvader el da midar opiniun fiss dentant stà deplazzà.
I na saja betg sia chaussa da giuditgar il davos giavisch da Vitus Huonder da vegnir sepulì en il quartier da la confraternitad da Pius X. I saja in segn da la realitad e correspundia a la tenuta da Huonder dals ultims onns, cura ch’el haja tgirà questa relaziun cun la confraternitad tradiziunala da Pius.
A Cuira vegnia Joseph Maria Bonnemain dentant er a manar tras in requiem – ina messa da morts – per l'anteriur uvestg. Per Bonnemain saja quai dretg uschia, cun quai che Vitus Huonder era plirs decennis en differentas funcziuns en l'uvestgieu da Cuira.
Sepultura sper il rebel cunter la moderna
Che Vitus Huonder vul vegnir sepulì sper Marcel Lefebvre correspunda ad in confess al moviment ch'era vegnì exclus dal papa sco «betg canonic». Tenor lur avis sa sentan ils aderents da la confraternitad da Pius X sco salvaders da la vaira baselgia roman-catolica. Els mantegnan il vegl ritus latin da messa, s’expriman per part omofob ed antisemiticamain e n’exequeschan naginas novaziuns da Roma. Ad Ecône han els lur quartier principal.
Lefebvre ha l'onn 1970 fundà ad Ecône la confraternitad ed il seminari da spirituals s. Pius X, nua ch'el ha refusà da surpigliar midadas en la Baselgia catolica. Cunter scumonds romans ha el ordinà spirituals – tenor il ritus vegl e scumandà, ma valaivel. Papa Paul VI ha il 1976 dispensà el da l'uffizi d'uvestg. Suenter in'ulteriura dispita cun papa Gion Paul II è Lefebvre 1988 lura vegnì excommunitgà. Mort è l'uvestg stgatschà il 1991 en la vegliadetgna da 85 onns.