Il chantun grischun vul fermas e grondas destinaziuns da turissem ed uschia spetga Jon Domenic Parolini era che Mustér e Sedrun giajan ina via communabla. Cas cuntrari stoppian las vischnancas viver cun las consequenzas. La basa per la decisiun da dar per la colliaziun dal territori da skis dad Andermatt e Sedrun trais milliuns à fonds perdu per l’emprima etappa è tenor Jon Domenic Parolini la collavuraziun sin il sectur turistic tranter las duas vischnancas. Sche Mustér e Sedrun na chattia betg ina soluziun communabla stoppia il chantun reponderar sia decisiun.
Consequenzas era sin daners da la confederaziun
Sch’il chantun reponderescha sia decisiun pudess quai era avair in influenza sin l’emprest da 40 milliuns che la confederaziun dat per l’emprima etappa da la colliaziun dal territori. Sco Jon Domenic Parolini di sajan quellas decisiun liadas ina cun l’autra.
Reacziuns dals responsabels dals territoris da skis
Silvio Schmid, il directur da la Andermatt-Sedrun Sport SA na vul betg commentar quest tema. Quai saja chaussa da las vischnancas da Tujetsch e Mustér, els na sajan betg partenaris.
En connex cun il project da colliar il territori da skis da Mustér cun ina pendiculara fin a Sedrun di Rudolf Büchi, il directur da las pendicularas da Mustér, di che quai na dettia bler da dir il mument. Mo i saja impurtant che las vischnancas da Mustér e Tujetsch lavurian ensemen en il turissem. E partenaris impurtants sajan era Andermatt e la Surselva.
Mustér stat davos ina destinaziun communabla
Sco il president communal da Mustér, Francestg Cajacob ha ditg a Radiotelevisiun Svizra Rumantscha fiss quai ina catastrofa, sch’i na dess betg quels daners per la regiun. La vischnanca da Mustér sezza stettia davos ina destinaziun da turissem communabla cun Sedrun. Perquai han represchentants da la vischnanca era dà suatientscha a l’invitaziun da Jon Domenic Parolini, dals departaments d’economia e turissem dal Grischun per discutar la situaziun actuala. La vischnanca da Tujetsch ha laschà perstgisar perquai ch’i n’han betg pudì s’organisar a curta vista dad ir a Cuira. Jon Domenic Parolini deplorescha che Tujetsch n’ha betg pudì vegnir a l’inscunter. Era a Mustér vegn scurlattà il chau. Francestg Cajacob è trumpà da quest agir. Beat Roeschlin ha dentant punctuà vers RTR, ch’i haja be tractà d’in problem da termin ch’ins haja a curta vista betg pudì s’organisar da pudair sa participar a quest inscunter.
Tujetsch ha decis avant in temp ch’els na veglian betg pli esser part da l’organisaziun Sedrun Mustér Turissem ed ha desditg ils contracts da collavuraziun sin la fin avrigl.
