Il chau dal departament da giustia, segirezza e sanadad Christian Rathgeb ha tratg ina buna bilantscha da la lavur da l’autoritad per la protecziun da l’uffant e da creschids KESB oz a Glion. Il dumber da cas per l’entir Grischun munta a 719 cas d’uffants e 1’900 cas da creschids. En relaziun cun il dumber da la populaziun èn quai 2,25% cas d’uffants e minorens (media svizra 1,16%) e 1,16% cas da creschids (media svizra 1,27%).
Era impurtant saja il fatg, che damain che 1% da las decisiuns da la KESB na sajan betg vegnidas acceptadas da las persunas pertutgadas ed hajan stuì vegnir tractadas da la Dretgira chantunala. Las decisiuns da la KESB vegnian pia per la pli gronda part acceptadas, la qualitad da las decisiuns constettia.
Nov parsura da la direcziun da la KESB
Giusep Defuns è vegnì preschentà sco nov parsura da la direcziun da las tschintg autoritads per la protecziun d’uffants e creschids dal Grischun. El resta vinavant il manader da la KESB regiun Surselva. Sco parsura è el dentant da nov responsabel per il contact da las 5 autoritads cun l'Uffizi da giustia, segirezza e sanadad.
Las ulteriuras incumbensas èn la coordinaziun tranter las autoritads, il svilup da la pratica e la garanzia da la qualitad. Era è la direcziun l’autoritad centrala per las convenziuns da Den Haag per la protecziun d’uffants e da creschids sco er l’autoritad executiva en cas da repatriaziuns d’uffants.
RR novitads 12:00