Sedrun Mustér Turissem (SMT) ha pudì preschentar in bun onn da fatschenta 2014/2015 a la radunanza generala a Mustér. Mo l’onn da fatschenta ha interessà ils pli paucs. Ils preschents avevan pli grondas marveglias coi va vinavant cun la destinaziun da turissem, medemamain ina tractanda da la radunanza.
SMT n’accepta betg proposta
La suprastanza da SMT ha dentant preschentà sut questa tractanda la posiziun sin ina proposta da la suprastanza communala da Tujetsch. Sco il president da SMT Curdin Brugger ha infurmà, hajan els survegnì ina proposta per ina collavuraziun punctuala. La vischnanca da Tujetsch na vul tenor questa proposta betg esser part da l’organisaziun turistica, mabain mo collavurar cun l’uniun quai che pertutga il marketing che Grischun vacanzas fa per SMT, e tar singuls projects. Il biro da turissem a Sedrun, sco era il stan d’infurmaziun sin il pass da l’Alpsu e las purschidas da turissem localas vul la vischnanca organisar sezza.
Questa proposta n’accepta SMT betg. Tenor Curdin Brugger funcziuna la destinaziun da turissem mo sche las duas vischnancas èn part da l’organisaziun, e na piclan betg mo ora las ivettas.
Politica duai mo agir strategicamain
Il president communal da Tujetsch, Beat Roeschlin, ha ditg che quai na constettia betg. La vischnanca da Tujetsch n’haja mai ditg ch’ella veglia mo ina collavuraziun punctuala cun SMT. Tujetsch na veglia simplamain betg ina cunvegna da prestaziun universala. Els veglian savair exact nua ch’ils daners che vegnan ord las taxas da turissem vegnian investids. La vischnanca da Mustér vesa quai auter. Sco il president communal Francestg Cajacob ha ditg, haja la politica da definir la strategia turistica e far ina cunvegna da prestaziun, e lura laschar lavurar SMT e betg sa maschadar en il manaschi operativ.
Tschertgar vinavant ina soluziun
Ils numerus votums dals preschents han sutlingià, che las vischnancas possian avair success mo sch’ellas collavurian ina cun l’autra en la destinaziun da turissem.
Coi va vinavant cun SMT n’è dentant anc adina betg cler. Sco Curdin Brugger ha ditg, saja ussa da laschar tschessar la discussiun e proximamain puspè seser vid ina maisa e tschertgar ina soluziun. El spera anc adina che Tujetsch restia part da SMT e ch’ins possia cuntinuar cun la lavur. Pertge era da vart dal chantun vegn pretendì, che las duas vischnancas furmian era vinavant ina destinaziun turistica. Cas cuntrari na vegn il chantun betg a sustegnair finanzialmain projects turistics. Quai è vegni communitgà cler e bain da l'Uffizi d'economia e turissem dal Grischun.