En las 3 galarias dal militar a Rueun è vegnì mesirà ina concentraziun fitg auta dal gas Radon. L’armada ha fatg quellas mesiraziuns perquai ch’ella na dovra betg pli las galarias e vul vender ellas. Che i dettia Radon a Rueun e conturn era enconuschent.
Tenor la pledadra da medias d’Armasuisse Jacqueline Stampfli èn las mesiraziuns vegnidas fatgas per savair infurmar potenzials cumpraders avertamain sur da la situaziun en las 3 cavernas. I na saja betg stà ina surpraisa per els che i saja vegnì mesirà ina tala concentraziun.
Armada na sanescha betg
L’armada na planisescha betg da sanar las galarias. Quellas investiziuns stoppia lura il nov possessur far, tut tenor sco el veglia duvrar las cavernas. Jacqueline Stampfli quinta che la concentraziun auta da Radon haja ina influenza sin il pretsch da vendita. Con gronda che quella influenza è saja dentant grev d’eruir.
Radon sa chaschunar cancer
Radon è in gas nuschaivel che sa chaschunar cancer dil lom. En ina da las cavernas è vegnì mesirà ina concentraziun da 5’000 Bq/m3.
Tenor il center da cumpetenza federal da protecziun cunter radiaziuns è la limita actuala per locals da cuminanza tar 1’000 Bq/m3. Ord quai motiv ha era il club da velos Surselva interrut per immediat lur trenaments en quellas cavernas. Il club da velos trenava mintgamai durant l’enviern ina giada per emna en las galarias a Rueun.