Siglir tar il cuntegn

Header

cuntegn

Surselva Bun quint per l’energia alpina

L’energia alpina serra il quint 2016 cun in gudogn da 633’241 francs, quai tar ina svieuta da var 9,5 milliuns. Quai scriva l’interpresa d’energia tuatschina en ses rapport annual.

Sco quai che l’interpresa scriva saja l’onn da fatschenta vegnì influenzà oravant tut da dus projects. Ina giada la colliaziun dal provediment d’electricitad da Sedrun en la Val Medel e lura era entras la construcziun da la rait per prender energia or da la terra. En tut saja vegnì fatg investiziuns da rodund 3,5 milliuns.

L’energia alpina tutga a la vischnanca da Tujetsch ed ha cun il resultat da l’onn passà pajà a la vischnanca 600’000 francs sco cumpart al gudogn e 182’910 francs en furma da concessiuns.

Ovra idraulica Val Strem

La bova en la Val Strem dal mars 2016, che ha disfatg la tschiffada ed uschia interrut la producziun d’energia en la Val Strem, n’haja gì nagina influenza sin il quint annual. La gronda part dals donns vid ils indrizs è cuvrida entras las segiradas. Er la sperdita dal retgav entras il stop da producziun d’electricitad saja cuvert per dus onns entras las segiradas. I vegn quintà da puder cumenzar questa stad cun las reparaturas.

La radunanza ordinaria da vischnanca da l'energia alpina è ils 9 da zercladur 2017 las 20.15 en l'aula da scola a Sedrun.

Artitgels legids il pli savens