Il «Chor mischedau da Sevgein» festivescha quest onn ses 40avel anniversari. Il chor concertescha ensemen cun ina chantadura professiunala. Per la mezsopranista indigena da Breil, Salome Cavegn, èsi l’emprima cooperaziun cun in chor da sia patria.
Il program da concert è empermettent: Felix Mendelssohn Bartholdy ha cumponì ina fulla chanzuns meditativas. Ovras romanticas ch’èn enconuschentas pervia dal tun en bleras vuschs e la melodia. Per exempel: «Verleih uns Frieden», u «Wirf dein Anliegen auf den Herrn» or da l’Elias. In pau èsi hits musicals dal 19avel tschentaner. Il concert da Pasca dal chor maschadà da Sevgein ha il titel «Denter tschiel e tiara». La dirigenta Flavia Walder è s’approfundada cun sia furmaziun en ovras sacralas da Mendelssohn, da Schuhmann, Jacob de Haan, John Rutter. La solista Salome Cavegn e Hanna Maria Meister, la pianista, interpreteschan in Kyrie ed in Gloria da Jean Langlais.
Muments singulars
En la baselgia parochiala da Sevgein dastga l'auditori sa legrar d’in program variant. La presidenta dal chor, Alice Bertogg, ha menziunà a chaschun d’ina emprova intensiva cun tuttas participantas e participants che l'artist da Sevgein, Tarcisi Cadalbert (1943-2003) saja medemamain integrads en il project da concert. Uschia na datti betg mo ina colliaziun tranter il terrester ed il celestial, mabain er ina unitad tranter talents indigens da differentas generaziuns.
Sfidas per dirigenta, chor e solista
Flavia Walder che ha dirigì l’emprima emprova communabla dal chor cun la solista Salome Cavegn è incantada da la collavuraziun.
La sfida principala è da procurar ch’il chor s’accordescha cun la solista. Per quai èsi impurtant che quel taidlia bain sin la solista.
Il chor taidla mintgatant uschè fitg sin la bella vusch da Salome, ch’els emblidan da chantar.
La solista Salome Cavegn ha cumenzà sia via sco chantadura tar la scola da musica Surselva, nua ch'ella ha gì scolaziun da vusch tier Letizia Scherrer. Silsuenter è ella sa scolada vinavant a la scol’auta d'art a Turitg nua ch'ella frequenta actualmain il studi da master en chant. La chantadura da professiun chanta sezza en differents chors.
Qua hai jau la rolla da solista. Igl è bel da vesair co il chor reagescha sin mai. Mintgatant sent jau co els emprovan da copiar mai. Da vesair cun tge motivaziun ch’els en vi da la chaussa è bel.
