Il fresco en il culmar tranter ils dus clutgers malegià dal pader Fridolin Egger era en in nausch stan. Sco la restauratura Sylvia Fontana ha ditg eran ils dus terz giudim dal maletg strusch pli avant maun entant che la part sura era anc bain vesaivla. Ina gronda sfida per ils restauraturs. Il fresco mussa Nossadunna cun mantè protegent. Ella tegna ses mantè sur ils cartents. Dad ina vart il pievel e da l’autra vart il clerus.
Gist tar las figuras dal clerus era quai da vesair mo pli conturas
Damai ch’ins n’haja betg pli pudì restaurar quellas, hajan ins sa decidì ensemen cun la protecziun da monuments chantunala e federala da malegiar da nov las figuras. Uschia èsi era stà da respunder la dumonda tge fatschas dar a las figuras. Sco Sylvia Fontana di, hajan ins constatà che l’avat Vigeli ha ina sumeglianta furma da fatscha sco l’avat sin il fresco.
Damai ch’i dat gia auters avats ch’èn vegnids purtretads en la claustra da Mustér è avat Vigeli stà pront da laschar purtretar el sin quest fresco.
Il plaschair è grond
Plaschair haja el dentant cunzunt ch’il fresco saja vegnì restaurà. Tgi dals confrars che vegnia ultra da quai anc sin il fresco ha tenor avat Vigeli la furma da la fatscha decidì. El haja survegnì l’incumbensa da tschertgar confrars cun ina tscherta furma da fatscha. Perquai n’haja quai era betg dà discussiuns u malaveglia tranter ils confrars pertutgant tgi che dastga u dastga betg vegnir sin il fresco.
Mez milliun da la Banca Chantunala Grischuna
Per la restauraziun da la baselgia da la claustra da Mustér dovri en tut 15 milliuns. Ina dals donaturs è era la Banca Chantunala Grischuna. Sco Alois Vinzens, il directur di, saja la claustra da Mustér in dals pli custaivels bains culturals dal chantun Grischun, perquai sustegnia la Banca Chantunala Grischuna la restauraziun. Fin ussa han 11,8 milliuns pudì vegnir recaltgads da donaturs, da la protecziun da monuments ed autras fatschentas ed instituziuns.
RR actualitad 12:00
Varianta dal purtret
Cumparegliaziun dals maletgs
