Glion è stà in dals lieus principals da la refurmaziun dal chantun Grischun. Cunzunt la baselgia refurmada da Glion, la baselgia da S. Margreta, vala sco lieu da partenza da la refurmaziun. Perquai èsi stà cler davent da l'entschatta per il reschissur Roman Weishaupt, ch'il teater stoppia entschaiver sin il plaz avant la baselgia.
Plaz da la S. Margreta e Museum Regiunal Surselva
Tribunas per ils aspectaturs datti dentant mo en la curt dal Museum Regiunal Surselva. Suenter ina curta entschatta da circa 20 minutas sin il plaz avant la baselgia, ston acturs ed aspectaturs midar lieu ed ir en la curt dal museum. Per quella midada èn quintadas en mo 10 enfin 15 minutas. Che quai gartegia era, mainan sper ils acturs era gidanters supplementars il public en la curt dal museum.
Avantatgs da midar lieus
Era sche l'organisaziun daventa pli cumplexa cun ina midada da lieu entaifer il toc da teater, tenor Roman Weishaupt datti era plirs avantatgs. Cunzunt saja il problem da las culissas schlià. E cun la baselgia refurmada ed il bajetg dal museum hajan els duas fitg bellas culissas istoricas. Plinavant dettia il bajetg dal museum cun tantas portas e fanestras era bleras pussaivladads da giugar, da nizzegiar quellas per surpraisas en il toc.
Sche i daratga...
Gronda influenza tar producziuns sut tschiel avert ha adina era l'aura. Uschia era tar la cumedia «Comander», perquai che tant il plaz da la S. Margreta sco era la curt dal Museum Regiunal Surselva n'èn betg cuverts. Sche l’aura sforza Roman Weishaupt dad ir cun la producziun sut tetg, vegniss il teater dentant giugà en il dretg lieu istoric, damai ch’il tetg fiss quel da la baselgia da la S. Margreta.
RR actualitad 17:00