Il suveran da Flem ha cleramain acceptà la revisiun parziala dal plan da zonas e dal plan general d'avertura, cun 879 vuschs Gea encunter 196 Na, tar ina participaziun da 57,8%. Entras quai vegn stgaffì la basa legala per pliras attracziuns da temp liber e turissem.
Per exempel pon ins construir duas novas sendas per velos da muntogna. Ina senda davent da la staziun da Startgels giu Foppa e tschella da Foppa giu Flem. En tut èn las duas sendas radund 8 kilometer lungas ed ellas èn prevesidas per novizs e famiglias.
Il plan da zonas sto vegnir midà, perquai ch'ina part dal trassé va tras il guaud e sur pastgiras. Senza questa midada da la planisaziun locala na fissi gnanc stà pussaivel d'inoltrar la dumonda da bajegiar. Il project na saja betg dispitaivel tar la populaziun, aveva Jürg Caprez, commember da la suprastanza communala, ditg avant la votaziun. Sulettamain ina vallada sitga nua ch'ils animals selvadis tschertgan protecziun haja procurà per dumondas dals chatschaders. Ins haja guardà cun ils organs da surveglianza da chatscha sche quai saja giustifitgabel.
Avant tschintg onns aveva il suveran ditg Gea a l'urna a la finanziaziun da 20 milliuns francs per construir il «FlemXpress». El aveva uschia contribuì in quart da la summa totala da construcziun. In proxim pass è uss da meglierar la purschida per il turissem da stad.
