Surselva - Cuminanza da viver empè da hotel

«Quaterfegl», uschia sa numna la societad ch’ha cumprà il Hotel Cucagna. Il num stat era gist per il concept. Gion Schwarz, il president dal cussegl d’administraziun ed acziunari declera quai uschia: «L’emprim figl munta che nus bajegiain abitaziuns primaras, il segund figl stat per abitaziuns da vacanzas, il terz per las fatschentas en chasa ed il quart per il servetsch da l’ustaria.» Sco el di vinavant duai quai dar ina cuminanza da viver tranter giasts ed indigens, tranter giuven e vegl.

Differents servetschs

Or da las chombras d’hotel datti 20 abitaziuns da 2 ½ fin 4 ½ stanzas. Fin sin trais èn tuttas adattadas per persunas pli veglias ubain impedidas. Ellas correspundian a las perscripziuns dal chantun. En chasa vegnia quai era purschì differents servetschs. Quai possia esser servetschs per persunas attempadas, dentant era per ils auters abitants, declera Gion Schwarz. Servetschs pussaivels pudessan esser: lavar resti, schubregiar l’abitaziun, servetschs da secretariat, servetsch da pasts euv. Ils servetschs vegnan purschids entras l’ustaria da l'anteriur hotel.

Perquai haja mintga cumprader d’ina abitaziun era aczias da l’ustaria. Quai dettia la pussaivladad als possessurs da cundecider tge servetschs che duain vegnir purschids, di Gion Schwarz.

Contact cun interessents

Chattar insatgi che surpiglia l’ustaria ed ils servetschs per ils abitants na saja betg simpel. Sco Gion Schwarz ha ditg, sajan ins dentant en contact cun differents interessents per sclerir tgenin che saja il pli adattà.

40 onns hotel

Il hotel Cucagna han Gion Schwarz e sia dunna manà durant decennis. Avant rodund 10 onns han els vendì l’hotel al figl e sia societad Cucagna SA. La fin 2014, cumenzament 2015 èsi stà cler ch’il figl na veglia betg manar vinavant l’hotel. Interessents per vender u laschar a tschains n’hajan ins betg chattà e perquai ha Gion Schwarz cumenzà a far ponderaziuns, tge far cun l’hotel ch’è enturn 40 onns vegl. La societad «Quaterfegl SA» quinta cun passa 7 milliuns francs per cumprar e bajegiar enturn l’hotel. Las lavurs cumenzan il mars e las abitaziuns duain esser prontas il favrer 2017.