A l’entrada da Flem vegnind da Laax, circa sin l’autezza dal campadi, vegnan construidas actualmain trais novas chasas cun total 27 enfin 30 abitaziuns da 3,5 e 4,5 stanzas. L’entir project da l’interpresa Miraselva SA da Flem custa tranter 15 e 18 milliuns francs. Tenor plan duain las trais chasas esser prontas l’atun 2018.
Per construir questas chasas ha la Miraselva SA spazzà duas chasas che tutgavan al hotel Waldhaus: la chasa cun in parc da raiver sin sugas autas OTA (pli baud era quai la halla da chavaltgar dal hotel Waldhaus) e da l’autra vart da la via ina chasa dal persunal dal hotel.
Futur dal Little China anc betg enconuschent
Ina terza chasa che la Miraselva SA ha cumprà dal Waldhaus è il bajetg dal restaurant chinais Little China e da la bar Bellavista. Tenor Sandro Hofmann dal cussegl d’administraziun da la Miraselva SA, n’existan anc nagins plans concrets per quai bajetg.
Il bajetg haja ina architectura interessanta ed els studegian co nizzegiar il bajetg senza stuair spazzar el. Actualmain sajan las abitaziuns en quai bajetg dadas a fit a stagiunaris. Enfin la primavaira 2017 vul la Miraselva SA decider tge far cun quai bajetg.
RR actualitad 07:00