La finamira saja da vegnir anc pli internaziunals, ha il scolast Ursin Defuns ditg ad RTR. El, il rectur dal gimnasi Bruno Hensler, e l’anteriur scolar Andreas Kühnis (spezialist da l’Asia, el discurra mandarin), èn stads dacurt en China.
Dira selecziun
Els han visità set scolas en las citads da Beijing, Najing, Shanghai e Suzhou. Ils scolars che vulan vegnir a Mustér vegnan selecziunads severamain, i dat per exempel era examens da tudestg. Per scola pon dentant mo mintgamai dus scolars s’annunziar. Sco Ursin Defuns ha ditg saja il viadi stà in success, perquai ch’els hajan gia survegnì las emprimas annunzias.
Contacts era cun autras terras
Il gimnasi da la claustra da Mustér n'è dentant betg mo en contact cun scolas en China, mabain era cun auters pajais. Ins vul paucs students da plirs pajais, per che era ils scolars indigens possian profitar e vesair il mund dad in’autra vista, uschia Defuns.