Glisch verda per viandar senza interrupziun tras la Ruinaulta

La regenza ha approvà la revisiun parziala da la planisaziun locala da Trin che prevesa in tunnel per peduns.

Senda da viandar planisada cun tunnel da peduns en la Ruinaulta. Bild in Lightbox öffnen.

Legenda da maletgs: Senda da viandar planisada (mellen) cun tunnel da peduns (blau) en la Ruinaulta. MAD

En l’avegnir èsi pussaivel da viandar senza interrupziun en il fund da la val tras la Ruinaulta. La regenza ha approvà la revisiun parziala da la planisaziun locala da Trin. La nova senda duai manar da la staziun da Trin a la punt «Isla-Bella» per lung dal trassé da la Viafier retica sco er tras in tunnel da peduns. Quai ha communitgà la regenza.

Organisaziuns da l'ambient pondereschan da far recurs

Las organisaziuns d'ambient èn trumpadas da la regenza grischuna ch'ella dat glisch verda ad ina senda per pudair viandar en l’avegnir senza interrupziun tras l'entira Ruinaulta. Quai di Jacqueline von Arx da la Pro Natura Grischun.

Els pondereschian da far recurs cunter la decisiun. Sco emprim veglian els uss examinar ed analisar l'argumentaziun da la regenza grischuna. 30 dis han las organisaziuns d’ambient peda da far recurs avant la dretgira administrativa.

RR novitads 10:00