Curt avant Nadal 2016 è vegnì inaugurà l’ascensur da la chasa da parcar che sa chatta sut l’ospital regiunal Surselva a Glion. Enfin lura stuevan visitaders e pazients, che vegnivan cun l’auto, ir pliras auzadas da stgala si fin l’entrada dal’ospital.
L'ascensur nov era ina buna chaussa, ch'è er vegnida appreziada.
Ascensur ha gì problems cun temperaturas bassas
Curt suenter si'avertura ha quai gia dà problems cun l’ascensur. Il modul da controlla n’era betg isolà bain avunda e na funcziunava betg, sche las temperaturas crudavan memia bass.
Tenor il directur da l’ospital, Marcus Caduff, han ils responsabels identifitgà quest problem il cumenzament da schaner. Els hajan decidì d’isolar meglier il modul da controlla per evitar il problem. Da furnir il material da reparatura a Glion haja dentant durà 10 dis, uschia che l’ascensur na saja betg stà en funcziun durant quest temp.
Uss saja la reparatura dentant fatga e l’ascensur funcziunia puspè senza problems. La reparatura haja custà in pèr tschient francs.
RR actualitad 08:00