Introducziun dal register funsil federal – possessurs ston reagir

Servituts sin parcellas che n’èn betg inditgadas en il register funsil n'èn betg valaivlas.

David Huonder cun in cudesch funsil dal 19avel tschentaner. Oz è quai in register digital. Bild in Lightbox öffnen.

Legenda da maletgs: David Huonder cun in cudesch funsil dal 19avel tschentaner. Ozendi è il register digital. RTR, C. Albin

Per ch’ina parcella possia vegnir registrada en il register funsil federal sto vegnir sclerì dal cudesch funsil responsabel, sch'ì dat servituts sin quella parcella. Suenter l’annunzia en il fegl uffizial chantunal, han possessuras e possessurs da dretgs sin parcellas almain dus mais peda d’annunziar las servituts funsilas.

L'emprima registraziun en in vegl cudesch funsil da Tenna dal matg 1839. Bild in Lightbox öffnen.

Legenda da maletgs: L'emprima registraziun en in vegl cudesch funsil da Tenna dal matg 1839. RTR, C. Albin

Servituts betg inditgadas perdan vigur

Tenor il manader dal cudesch funsil da la vischnanca da Glion, David Huonder, possia dar, che servituts na sajan betg registradas en il register funsil chantunal ch'è actualmain anc en diever. Sche quellas possian vegnir cumprovadas, sajan ellas tuttina valaivlas. Auter tar il register funsil federal: Là n'èn servituts betg registradas era betg valaivlas.

Controllar il register funsil chantunal

Per quest motiv cusseglia David Huonder era, che possessuras e possessurs da talas servituts controlleschian sco emprim las indicaziuns fatgas en il register funsil chantunal per las atgnas parcellas. Sche quellas na constattan betg, sto quai vegnir annunzià aifer dus mais al register funsil. Sche pussaivel cun ina descripziun ed in plan che mussa la localisaziun da la servitut. Ideal fiss anc da trametter la cunvegna signada dad omaduas partidas, sch’ina tala cunvegna exista.

RR actualitad 11:00

Survista da las vischnancas che han gia introducì il register funsil federal. Bild in Lightbox öffnen.

Legenda da maletgs: Survista da las vischnancas che han gia introducì il register funsil federal (20.04.2017). Inspecturat dal register funsil dal Grischun

Emissiun tar quest artitgel