Tagliar davent il grass, quai è la devisa da Richard Atzmüller il manader da l'Uffizi chantunal per il svilup dal territori. Per la Lumnezia munta quai che las zonas da bajegiar da mintga vischinadi vegnan sut la marella.
L’entira Lumnezia ha 17 hectaras terren da bajegiar. Sch'ins cumpareglia quai cun las spetgas dal svilup da la populaziun, saja quai memia bler. La Lumnezia patescha da depopulaziun, il dumber d'abitants sa sminuescha. Las cifras mussan che l'onn 2040 vivan radund 300 persunas pli pauc en Lumnezia.
Chantun e Confederaziun cumondan
Il chantun Grischun sto ademplir las novas leschas territorialas che vegnan prescrittas da la Confederaziun. Quai èn prescripziuns che han da far cun l’iniziativa cunter la construcziun dischordinada ch'il pievel svizzer ha acceptà l'onn 2013.
Lumnezia patescha
Quant terren da bajegiar che la Lumnezia sto effectiv reducir n'è betg cler. Cler è dentant che quai ch'è da memia en Lumnezia manca en la regiun da Cuira. Tenor il plan dal chantun vegni a dar in transfer dals territoris cun memia bler terren da bajegiar tar ils territoris cun memia pauc terren. Duri Blumenthal, il president da la vischnanca da Lumnezia, è conscient che 17 hectaras è memia bler.
Reducir vegn dentant a chaschunar bain inqual dispita. Era sa tschenta la dumonda d'ina indemnisaziun, surtut en cas nua ch'il terren è gia preparà. 4 onns suenter la fusiun èsi nairas uras per la Lumnezia da far vinavant cun la revisiun da la planisaziun locala.
Zona da bajegiar anc libra en las fracziuns lumnezianas
| Lieu | Terren betg surbajegià | Abitants | m²/abitant |
|---|---|---|---|
| Suraua | 2,5 ha | 228 | 110 m²/abitant |
| Vrin | 1 ha | 216 | 46 m²/abitant |
| Lumbrein | 3,6 ha | 350 | 103 m²/abitant |
| Vignogn | 1,6 ha | 156 | 103 m²/abitant |
| Degen | 4,5 ha | 214 | 210 m²/abitant |
| Vella | 1,4 ha | 492 | 28 m²/abitant |
| Morissen | 1,8 ha | 221 | 81 m²/abitant |
| Cumbel | 1,3 ha | 227 | 57 m²/abitant |