Dals 5 sez en suprastanza da Laax vegnan 2 mintgamai occupads in onn avant las elecziuns dal president e dals dus ulteriurs suprastants. Quai per evitar che l’entira suprastanza midia il medem mument. A Laax van quest onn las legislaturas da duas commembras da la suprastanza communala a fin, Marita Bürkli e Silvia Thoma.
Marita Bürkli candidescha, Silvia Thoma chala
Marita Bürkli, ella maina il departament puresser, alps, natira, protecziun d’ambient, turissem e cultura, stat vinavant a disposiziun e candidescha per ina ulteriura perioda d’uffizi 2017 – 2020.
Silvia Thoma (departament da construcziun, vias publicas, provediment d’aua, dismessa d’aua persa e da rument) ha decidì da na betg pli candidar per la suprastanza.
Candidats uffizials per remplazzar Silvia Thoma n’èn tenor il chanzlist communal Rest Giacun Coray betg anc enconuschents. Coray spetga dentant, ch'i dettia anc in u l'auter candidat uffizial, p.ex. ord las retschas da l'uniun da manaschis da commerzi e d'industria Alpenarena.