Lavurs da sanaziun al lai da fermada Zervreila

La svidera da fund ed auters indrizs da segirezza vegnan sanads per 8,3 milliuns francs.

Ils indrizs da segirezza dal lai da fermada Zervreila (la svidera da fund, l’avertura per l’aua da dotaziun, differents conducts da pressiun ed ils ventils da segirezza correspundents) èn dapi 60 onns en funcziun. Els èn durant quest temp adina vegnids controllads, dentant mai sanads. Perquai han las Ovras Electricas Zervreila decidì da manar tras quellas lavurs da sanaziun l’enviern 2018, dal favrer enfin ca. fin avrigl.

Lavurs sut aua

Sursiglir cuntegn supplementar

Tgè e PCB?

PCB èn cumbinaziuns da chlor toxicas che pon effectuar cancer. Fin ils onns 1980 èn questas vegnidas duvradas surtut en transfurmaturs ed implants electrics sco liquid idraulic, però er sco lomiaders en lacs e meds d’isolaziun. PCB tutga entant tar las 12 substanzas toxicas organicas ch’èn vegnidas scumandadas il 2001.

Per pudair sanar la svidera da funs ed ils conducts da pressiun ston quellas installaziuns esser senz'aua. Ideal fiss sche las Ovras Electricas Zervreila pudessan svidar il lai cumplettamain. Il chantun ha dentant betg lubì quai per proteger l’ambient, per ch'ils sediments sin il funs dal lai na vegnian betg lavads ora en il Rain da Val. Uschia dastga il lai mo vegnir svidà per part e la svidera da fund sa chatta anc sut l'aua. Las lavurs vid la svidera da fund ston perquai vegnir fatgas da sfunsaders. Entras quellas lavurs vegn il sediment dal lai leventà ed ils sfunsaders vegnan a vesair pauc u nagut sut l’aua.

Colurs cun PCB

Sco che la lingia da pressiun da la svidera da funs è serrada cun in «stapun» (in bischen d’atschal che vegn betunà en la svidera) e sitga, po ella vegnir sanada. E là spetga la secunda gronda sfida tenor il maina project Hans-Peter Capatt. Las colurs utilisadas per proteger ils conducts da pressiun cuntegnan la substanza toxica PCB. Quella na dastga betg vegnir derasada en l’ambient e perquai ston vegnir construidas tendas enturn tut ils plazzals pertutgads per savair tschitschar giu il PCB.

Custs da 8,3 milliuns

Tut quellas lavurs cumplitgadas e betg usitadas han er in effect sin ils custs da la sanaziun. En tut custa quella numnadamain 8,3 milliuns francs. 1 milliun francs custa gia la planisaziun da questa sanaziun.

RR actualitad 08:00