Dar a fit abitaziuns secundaras per far vacanzas, quai tuna fitg simpel e logic. Mo davostiers sa zuppa ina lavur da persvader ils possessurs da talas abitaziuns, ed in entir sistem da vender e da cudeschar. «Warmes Bett.ch» dat i dapi l'onn 2010, e quella fatschenta è creschida da 273 pernottaziuns l'emprim onn sin ussa 14'000 pernottaziuns ad onn. In'istorgia da success, che ha entschet cun ina simpla idea da trair a niz il potenzial da la abitaziuns secundaras.
Per l'iniziant Gian Derungs dat i duas sorts da clientella. El ha d’ina vart il possessur ch’el sto persvader da laschar vi las abitaziuns. E da l’autra vart sto el occupar las abitaziuns cun giasts da vacanzas.
Tema che l'abitaziun vegn malduvrada
I na saja betg adina simpel da persvader il possessur d'abitaziuns secundaras, manegia Gian Derungs.
Mo cun il sistem cun in servetsch cumplet funcziunescha la collavuraziun. Il possessur sto mo inditgar tge dis ch’el vul l'abitaziun per sasez, ed inditgar il conto da banca. Per tut il rest procura la fatschenta da Gian Derungs.
«WarmesBett.ch» dat a fit abitaziuns naven da Vrin fin a Sedrun, durant il temps da stagiun auta lavuran fin 20 persunas per la fatschenta.
Per metter en relaziun il success da «WarmesBett.ch», las 14'000 pernottaziuns ch'els fan en l'entira Surselva è il dubel da las pernottaziuns da hotellaria en la Lumnezia, u passa in terz da las pernottaziuns da hotellaria da Mustér.
RR actualitad 07:00