L’impuls da meglierar il trutg da la Greina en la Val Sumvitg è vegnì dal guardiachamona da la chamona dal Terri, Toni Trummer. El ha contactà il suprastant e responsabel per sendas e trutgs da la Val Sumvitg, Ignaz Deplazes. Il problem è cunzunt da vegnir giu da la Greina in di ch’i plova ha Ignaz Deplazes declerà. Il trutg maina sur grippa ora nua ch’ins po tgunsch glischnar ora. Perquai è vegnì furmà cun agid da cumpressurs pass en il grip per pudair tschentar là il pè. Ultra da quai è vegnì furmà ord crappa stgalims e tratg davent l’aua or dal trutg.
Gidà tar la lavur han ils emprendists da miradur, che han cunzunt fatg las lavurs tecnicas, ina scola da la bassa e l’Uniun da giuventetgna Surrein che han fatg lavurs in pau pli simplas. Cun quest agid hajan ins pudì tegnair ils custs tar 40’000 francs. La gronda part dals custs è vegnida duvrada per l’alloschi e l’alimentaziun dals gidanters e per maschinas e material.
Il guardiachamona da la chamona dal Terri è cuntent cun la lavur. El quinta cun dapli viandants uschè spert ch’igl è sa discurrì enturn ch’il trutg saja vegnì meglierà.
