Siglir tar il cuntegn

Header

cuntegn

Surselva Mustér: 4 da 5 na candideschan betg pli

La vischnanca da Mustér ha da tschertgar prest in'entira nova suprastanza per las elecziuns dal settember. Il cussegl da vischnanca è vegnì infurmà da la suprastanza.

audio
Francestg Cajacob na chandidescha betg
ord RTR Audio dals 22.04.2016.
laschar ir. Durada: 2 minutas 34 Secundas.

Suenter mo ina perioda d’uffizi da 4 onns sa retira il president da vischnanca Francestg Cajacob. El fa valair raschuns persunalas. «L’engaschament sco president communal è fitg pretensius» declera Francestg Cajacob. I dovria bler temp per represchentar la vischnanca ubain era projects, uschia che la famiglia vegnia a la curta. I na giaschi betg vi dal clima da lavur en suprastanza ed er betg vi da la tema da betg pli vegnir reelegì, punctuescha Cajacob.

Francestg Cajacob aveva dà giu ses post tar il chantun cura ch’el è daventà president communal. Uschia hai gì num per el tschertgar ina nova occupaziun. Quella ha el danovamain chattà tar il chantun. Davent dals 1 da matg 2016 lavura el 30 pertschient sco revisur per l’autoritad per la protecziun da l'uffant e da creschids (KESB) a Glion. Davent dal 2017 lura 50 pertschient.

video
Francestg Cajacob na candidescha betg pli
Or da RTR dals 23.04.2016.
laschar ir. Durada: 2 minutas 5 Secundas.

Suenter 11 onns na candidescha era Roger Tuor betg pli per la suprastanza. El ha gia prendì questa decisiun dapi in temp ed era gia fatg quai a scrit. Roger Tuor na pudess era betg pli candidar, damai ch’el daventa davent dal proxim onn da scola manader da la scola Mustér.

audio
Las raschuns davart la demissiun da 4 da 5 suprastants da la suprastanza communala da Mustér
ord RTR Audio dals 23.04.2016.
laschar ir. Durada: 4 minutas 56 Secundas.

Cecilia Maissen è vegnida elegida il 2008 en suprastanza. Era tar ella n’èsi betg ina surpraisa ch’ella na candidescha betg, damai ch’ella ha era gia laschà savair quai.

Per raschuns professiunalas na vul Madlen Deflorin betg pli laschar eleger en suprastanza. Ella ha surpiglià quest enviern a Laax il post d’integraziun en Surselva tar inplus e vul sa focusar sin questa nova plazza. Elegida en suprastanza è Madlen Delforin l’onn 2010.

Il sulet suprastant che candidescha ina ulteriura giada è Iso Mazzetta. El è dapi il 2007 en suprastanza.

video
Iso Mazzetta è il sulet suprastant che candidescha
Or da RTR dals 23.04.2016.
laschar ir. Durada: 1 minuta 51 Secundas.

Cumissiun duai tschertgar candidats

La communicaziun che 4 da 5 suprastants sa retirian n’ha betg procurà per reacziuns tar las cusseglieras ed ils cussegliers durant il cussegl. Ch’ils trais suprastants na candideschian betg in’ulteriura giada n’eri betg ina surpraisa, ha ditg il president Livio Zanetti.

video
Livio Zanetti, president dal cussegl da vischnanca
Or da RTR dals 23.04.2016.
laschar ir. Durada: 2 minutas 22 Secundas.

Proximamain vegn mess ensemen ina cumissiun che vegn a surpigliar la lavur da tschertgar candidats per ils posts communals. Presidiada vegn quella cumissiun da Duri Huonder, ch'è tranter auter stà suprastant da la vischnanca da Mustér. Las elecziuns communalas èn ils 25 da settember.

Artitgels legids il pli savens