La moziun suttascritta da 11 cusseglieras e cussegliers sa basa sin ina empermischun dal 2008. Per sanar las finanzas communalas era lura vegnì augmentà il pe da taglia da 105 sin 120% da la taglia chantunala, e la taglia sin giaschom da 1 sin 1,7 promils, quai per in temp limità da 4 fin 5 onns. Quest temp saja ussa passà uschia ch’il temp saja madir, ha ditg il moziunari Flavio Murer.
Dapli expensas e damain entradas
Sco quai che la suprastanza scriva en il messadi hajan ins pelvair pudì reducir marcantamain il daivet, e quai da 17,4 milliuns sin 3,9 milliuns francs dapi il 2008. Malgrà quai n'èsi tenor il president communal Francestg Cajacob betg prudent da sbassar las taglias. Il temp saja sa midà: «Nus avain dapli expensas cunzunt en il sectur da sanadad, e da l’autra vart n’avain nus betg pli las entradas d’energia che nus avain gì ils ultims onns» ha ditg Francestg Cajacob. Latiers vegnan grondas investiziuns che la vischnanca sto far en l’avegnir. Quai per exempel per la sanaziun da la scola ubain dal center da sport e cultura u per vias. En l’analisa èn previsas investiziuns da 20 milliuns francs. Cun far questas investiziuns aifer ils proxims 5 onns s’augmentass il daivet da la vischnanca sin var 25 milliuns francs. Tenor Francestg Cajacob na sajan questas investiziuns betg realisablas aifer mo 5 onns. La suprastanza haja dentant vulì mussar al cussegl da vischnanca tut las investiziuns che stuessan vegnir fatgas en l’avegnir.
Gronda discussiun
Ils cussegliers han discutà ditg e lung. La vischnanca dovria ils daners per pudair far investiziuns ed uschia restar attractiva. Auters han manegià ch'i saja pli prudent da betg sbassar ussa il pe da taglia, ed en in per onns stuair far gronds sforzs per auzar quel anc pli fitg. Vinavant è era vegni menziunà pliras giadas, che Mustér na daventia betg pli attractiv sco lieu d’abitar mo perquai ch'ins sbassia il pe da taglia.
Acceptà proposta da la suprastanza
La finala èn 12 dals 15 cussegliers s'accordads cun la proposta da la suprastanza da betg sbassar las taglias, ed han incumbensà la suprastanza d’elavurar il preventiv 2016 sin basa da las taglias actualas. Quai dentant cun la cundiziun dad era preschentar pussaivladads da spargnar. Flavio Murer po acceptar questa decisiun democratica, el ha dentant fatg la proposta a la suprastanza dad infurmar la populaziun ad ina saira d’infurmaziun. La suprastanza ha dà suatientscha a quest giavisch. Il cussegl tracta ils pes da taglia ensemen cun il preventiv il november.
Auzament da las taxas per aua tschuffa
Mo pauca discussiun ha l’auzament da las taxas da diever per la chanalisaziun e la serenera chaschunà. La suprastanza vul augmentar questas per 50% per uschia pudair curclar ils custs da manaschi. Quels vegnivan fin ussa curclads cun las taxas da colliaziun, che fissan destinadas primarmain per investiziuns ed adattaziuns. Il cussegl da vischnanca ha dà l’incumbensa a la vischnanca da preparar la revisiun parziala dal regulativ da taxas correspundent.