Suenter ch’il suveran da Mustér ha approvà la dumengia la revisiun parziala da la planisaziun locala, è la realisaziun dal ressort da vacanzas che las Pendicularas da Mustér vulan bajegiar sin lur parcadis, in pass enavant. En il ressort èsi tranter auter era previs stizuns. En ina da questas stizuns vul il Coop sa chasar da nov. Quai ha la responsabla per las medias da Coop, Heidi Anderes ditg a Radiotelevisiun Svizra Rumantscha. Las novas localitads èn 84 quadrats pli grondas che quellas da la stizun actuala amez il vitg. Cun quest engrondiment possian ins adattar las localitads als basegns da la clientella.
Problem da parcadis
Per il Coop a Mustér vegn gia daditg tschertgà meglras localitads. La raschun persuenter èn ils paucs parcadis che n’èn era betg bain accessibels. Tar la surbajegiada dal Ressort Catrina vegnan a star a disposiziun 38 parcadis per la clientella e quai sin il medem plaun sco la stizun. Quai vegnia giavischà ozendi da la clientella. Ch’ins perdia clientella cun ir a l’ur dal vitg cun la stizun, na quinta Heidi Anderes betg. Ins haja ponderà fitg bain quest pass. Detagls davart custs u termins n’ha ella anc betg vulì far. Anc na saja betg tut suttascrit.
Stizun a Sedrun resta
La stizun a Sedrun na tangheschan betg ils plans da midada ed engrondiment a Mustér. Sco quai che Heidi Anderes ha ditg, sa tegnia il Coop vi dal lieu a Sedrun, uschia che questa stizun restia vinavant.