Sco quai che la possessura da l'hotel Acla da Fontauna, la Brandis Investment SA da Maiavilla communitgescha, hajan els chattà la Immo Invest Partner SA da Glattbrugg sco investider. Il contract saja vegnì segnà la mesemna. L'investider planisescha da construir a Mustér in hotel cun 170 chombras e suitas, sco era 100 abitaziuns administradas ed abitaziuns secundaras. Manar l'hotel duai ina gruppa d'hotels ch'è activa sin l'entir mund. Ils investiders quintan d'investir 100 milliuns francs e pudair avrir l'entschatta 2021.
Tenor il manader da fatschenta da la Immo Invest Partner SA Frenk Djordic, saja il basegn per in hotel modern cun in aut standard avant maun a Mustér. Quai pervi dals plans per ina colliaziun dals territoris da skis da Mustér e Sedrun, e pervi da la sanaziun dal center da sport e cultura che la vischnanca haja previs.
La Brandis Investment SA aveva cumprà l'hotel ch’è dapi il 2001 vit da la Banca chantunala grischuna il schaner passà.
Nova speranza
Da vart da la vischnanca han ins plaschair da questa novitad. Sco ch'il president communal Robert Cajacob ha ditg ad RTR, haja el in bun sentiment envers ils possessurs da l'hotel. Cun la realisaziun dal project vegniss finalmain schliada la situaziun problematica da l'hotel serrà.
Vinavant declera Robert Cajacob ch'il project purtass lavur a las fatschentas da construcziun ed autras fatschentas. E quai muntass era novas plazzas da lavur per la vischnanca e la regiun.
RR novitads 09:00