Notg culturala Surselva ord vista d’ina artista

L'idea da quella saira: Artistas ni ils artists van tar ils aspectaturs e betg ils aspectaturs van tar ils artists. Ina situaziun nunusitada per ils artists.

Flurina Casty durant ina da sias preschentaziuns. Bild in Lightbox öffnen.

Legenda da maletgs: Flurina Casty durant ina da sias preschentaziuns. RTR, Carlo Albin

Sonda, ils 17 da zercladur ha gì lieu per l'emprima giada la «Notg culturala Surselva». Durant quella saira han ils aspectaturs pudì ir en in restaurant che ha prendì part a la notg culturala, giudair ina buna tschavera e durant la saira èn lura trais artistas ni artists vegnids speravi e sa preschentà al public. Pia quasi la via cuntraria che usità, nua ch'ils aspectaturs van en ina sala per vesair ni tadlar l'artist. Ina situaziun nunusitada per ils artists. Era per Flurina Casty, ina giuvna artista da performance da Cuira, che ha mussà in video e raquintà istorgias latiers.

Per ina artista da performance èsi impurtant da savair co il lieu nua ch'ella sa preschenta vesa ora. Normalmain sappia ella quai gia lunsch ordavant e possia era planisar sia performance tenor il local. Quella giada haja ella dentant gist survegnì l'infurmaziun intgins dis avant l’eveniment. Uschia haja ella stuì modifitgar la preschentaziun.

Maulta per terra

Cun sia performance vul Flurina Casty declerar sia relaziun cun il rumantsch, ch'ella ha bain discurrì sco buobetta, ch'ella ha dentant emblidà sur onns perquai ch'ella ha mai duvrà quai linguatg. Per far quai dovra ella in laptop, in beamer, in microfon cun boxa ed in zaiver cun maulta. A la fin da sia preschentaziun metta ella maulta giun plaun e stat cun ses pes bluts en quella maulta. Per pudair far quai dapertut ha ella stuì planisar en anc ina taila e palpiri da metter giun plaun per betg tschufragnar ils palantschieus dals restaurants.

Il stress da stuair midar restaurant ed esser pinada per la proxima preschentaziun entaifer curt temp n'ha betg disturbà l'artista. Als aspectaturs en ils differents restaurants ha la preschentaziun da Flurina Casty plaschì, era sche betg tuts han chapì tge che l'artista vuleva propi dir cun sia performance.

RR actualitad 08:00