L’onn passà ha la corporaziun Regiun Surselva cumprà in agen bajetg a Glion e centralisà ina gronda part dals biros da las differentas partiziuns ch’eran sparpagliads en plirs bajetgs per Glion enturn. Era la scola da musica Surselva ha uschia survegnì novas stanzas d'emprova en il plaunterren dal bajetg, en in anteriur magasin. Quellas stanzas èn dentant betg vegnidas realisadas sin moda e maniera classica cun trair en mirs en il magasin. Ellas èn moduls da lain prefabritgads, ch’èn simplamain vegnids stuschads viaden en il magasin.
Containers da lain
Dador vesan ils moduls or sin l'emprima egliada sco containers da transport, simplamain ch'els èn da lain. Ina differenza che croda en egl èn las grondas rusnas davant e davos, nua ch’i vegn bajegià pli tard ina fanestra ed ina porta. Cun excepziun da las rusnas èn las stanzas d'emprova gia drizzadas en cun bischlas, chazzolas e schizunt ina pigna sut la fanestra. Las paraids dals elements èn fatgas or da plattas da lain pign da 80 millimeters grossezza e mintga element paisa 2,5 tonnas. Tranter ils elements sco era sut ils elements vegn installà supplementar in’isolaziun speziala per diminuir il tun, betg ch’i rebattia en las boxas u en il magasin.
RR Total local 11:45