Siglir tar il cuntegn

Header

video
Peiden ruschna – perquai vegn tut la Lumnezia mesirada da nov
Or da Telesguard dals 19.04.2017.
laschar ir. Durada: 3 minutas 46 Secundas.
cuntegn

Surselva Peiden: Lingia d'aua rutta mussa ch'il vitg sa mova anc adina

Il vitg sa mova cun ina spertadad da circa 8 centimeters ad onn vers la val.

Che Peiden ruschna è in vegl fenomen. Las cifras exactas èn enconuschentas. Sch'ina chasa a Peiden ha ina sfendaglia u il mir dil santeri stgarpa dapart na fatschenta quai betg ils da Peiden. Ina lingia d’aua che rumpa è simplamain da pinar e basta. Ins viva simplamain cun quai ch'il vitg ruschna tic a tic.

In paliet che mussa la direcziun nua ch'il vitg da Peiden sa mova.
Legenda: Cun GPS èsi simpel da cumprovar quest moviment. RTR, Linus Livers

Mo en Lumnezia datti era auter terren en moviment. Ins sa dir ch'en media sa mova la Lumnezia cun 4 centimeter ad onn encunter il Glogn. Las mesiraziun fatgas avant varga 20 onns han mussà che pulitas parts da la Lumnezia eran ruschnadas per 90 centimeters. I dat dentond era excepziuns, nua ch'igl è betg ruschnà e nua ch’igl è ruschnà anc dapli.

Tge che vala sco Territori en moviment, è vegnì definì da la Conferenza dals servetschs chantunals da mesiraziun uschia:

  • 0-2 cm ad onn substabil, fitg plaun
  • 2-10 cm ad onn pauc activ, plaun
  • 10 cm ad onn activ

Ch'i dat novas cifras per la Lumnezia ha da far cun la fusiun da la vallada. Entras quella fusiun han ins vulì metter ensemen la vischnanca ed ha lura sefatg en ch'i deva differenzas tranter las anteriuras vischnancas. Ils craps da cunfin vevan autras coordinatas che quellas el cudesch funsil. Quai è vegnì adattà matematicamain. Ils puncts ora sin il terren èn restads.

L' inschigner geometer Kurt Pfennnger da la Straub SA che ha fatg quella lavur, ha manegià ch'i dovri betg uschè spert puspè ina tala mesiraziun, era sch'il terren è en moviment. Il Geometer stoppia simplamain savair ch'il terren è en moviment ed adattar quai en sia mesiraziun.

Ord l'archiv

RR actualitad 11:00

Artitgels legids il pli savens