Pro Idioms cumbatta vinavant il rumantsch grischun en scola

La Pro Idioms Surselva PIS crititgescha vehementaimain la segunda versiun dal plan d’instrucziun 21. La regenza grischuna n’haja betg midà ils puncts che pertutgan il rumantsch grischun en scola.

Ils commembers da la suprastanza da la Pro Idioms Surselva. Bild in Lightbox öffnen.

Legenda da maletgs: Il plan d'instrucziun 21 na plascha betg a la Pro Idioms Surselva. RTR, L. Livers

En il plan d’instrucziun 21 pretendia la regenza che scolaras e scolars rumantschs che fineschan la scola stoppian avair cumpetenzas en rumantsch grischun.

La Pro Idioms Surselva crititgescha il plan d'instrucziun 21

2:33 min, Actualitad video dals 12.3.2015

Quai malgrà che las vischnancas èn sa decididas per l’idiom, di Carin Cadruvi, commembra da la suprastanza da la PIS.

Be 2 vias pussaivlas

Sco il president partent da la PIS Heinrich Berther ha ditg, dettia quai 2 vias pussaivlas da

cumbatter il plan d’instrucziun 21: Ina votaziun dal pievel ubain la via politica. Success possian els dentant avair mo sch’els cumbattian ensemen cun la Lia Rumantscha.

Plinavant ha la radunanza generala elegì Lorenz Alig sco nov president da la Pro Idioms Surselva.

«  Il cumbat ei aunc buca a fin. »

Lorenz Alig
Deputà e president novelegì da la Pro Idioms Surselva

Lorenz Alig curt suenter si'elecziun. Avrir maletg en lightbox.

Legenda da maletgs: Lorenz Alig curt suenter si'elecziun. RTR, L. Livers

Avant 4 onns è l’uniun Pro Idioms vegnida fundada. La finamira è stada da bandischar il rumantsch grischun ord las scolas, ina finamira che para dad esser cuntanschida. En l’entir intschess rumantsch èsi mo Trin e las scolas dal Surses che han salvà il rumantsch grischun. Malgrà quest fatg è Lorenz Alig, il nov president da la Pro Idioms Surselva, persvadi ch’i dovria vinavant questa uniun. Il cumbat per l’idiom na saja betg a fin. Ussa valia da guardar sin la detta als pussants che veglian introducir il rumantsch grischun sur il plan d’instrucziun 21.

La sala da cultura fullanada a Trun ha dà in schatg da quest moviment ch’è era suenter 4 onns anc preschent e che na lascha betg luc en il cumbat per l’idiom.