Laura Schmed, Julia Hansen, Dario Camenisch, Severin Bonolini e Mauro Arpagaus da Petta Pagada na dattan per il mument nagins concerts. Las musicistas ed ils musicists sa focuseschan sin lur chanzuns e lur arranschaments, ed els scrivan nova musica. La gruppa che fa rock rumantsch registrescha ils fritgs da lur lavur la stad proxima cun l'agid dal label da musica R-Tunes che promova musica rumantscha.
Il rumantsch ha ina gronda impurtanza ed er il num Petta Pagada descriva nus fitg bain.
Cun Laura Schmed sco chantadura e ghitarrista e Dario Camenisch vi da la ghitarra ha Petta Pagada dus pols che defineschan il stil: Laura Schmed chanta texts rumantschs e suna melodias che naschan or da ses stil da songwriting, Dario Camenisch procura per ils riffs ed ils solos da rock. Il bass da Severin Bonolini e la battaria da Mauro Arpagaus dattan il fundament e Julia Hansen colurescha la musica da rock cun la violina sco Donna Shea tar Bob Dylan u Warren Ellis tar Nick Cave & The Bad Seeds.
Da las entschattas sco duo debutond enfin Petta Pagada
Dario Camenisch e Mauro Arpagaus fan dapi l'onn 2018 ensemen musica en l'anteriura scoletta da Pitasch. Da lez temp era la musica anc fitg rudimentara, Dario Camenisch sa regorda ch'el na saveva strusch sunar ghitarra. Quai è sa midà: la band è betg mo vegnida musicalmain meglra, ella è era creschida.
Cumenzà hai cun ina ghitarra ed in cahon.
Suenter ina saira da sortida a Cuira èn Laura Schmed e Severin Bonolini daventads commembers da la gruppa ed ella ha en quella furma survegnì il num Petta Pagada. Cumenzà ha il quartet cun covers da bands sco The Pixies, Blur e T-Rex. Ma bainprest èn els ids vi dad atgnas chanzuns, las talas scriva ed arranscha la gruppa communablamain. Laura Schmed scriva texts rumantschs e quels duain dar da patratgar, uschia la chantadura. Tge che saia era manegià cun il num Petta Pagada che vul dir che la vendetga saja fatga. Ina vendetga che la gruppa da rock fetschia cun ses texts.
Dapi in concert acustic che la band ha sunà quest onn en la Cuort Ligia Grischa a Trun ensemen cun la violinista Julia Hansen, è lezza la tschintgavla commembra permanenta. La combo è cumpletta ed ha chattà ses stil.
