La mesemna è il transport grond vegnì si dal chantun Son Gagl, cun il container construì unicamain per Rueras. Quai è l’emprim container en questa furma da l’interpresa, e quai fa grond plaschair al mainafatschenta Fredy Caminada che maina era ina stizun Spar a Mustér. La purschida actuala è totalmain digitala, l’access è pussaivel cun in telefonin che porscha era la pussaivladad da pajar per exempel cun Twint ni ina carta da credit. Per il manaschi sez muntia quai da pudair spargnar custs da persunal – e tuttina porscher ils products dal mintgadi. La tgira dal container, vul dir emplenir e schubregiar, quai vegnian els a far mintga di davent da Mustér. Il paun porta il pasterner sez e metta en las curunas, di Fredy Caminada.
Parcella da la vischnanca
La vischnanca da Tujetsch ha mess a disposiziun la parcella actuala. Planisà era da realisar en quest lieu ina chasa per indigens, di il president communal Martin Cavegn. Quai saja vinavant la finamira – ma a la sperta hajan els gì la pussaivladad da porscher maun cun questa parcella. Els sappian però er che quai saja ina fasa da test. Tuttina spera la vischnanca ch'i daventa or dal provisori ina purschida fixa. Per quella vegnian ins era a chattar in lieu adattà, uschia Martin Cavegn.