Il resultat da las analisas approfundadas da las 3 variantas per ina nova via da colliaziun da Sagogn cun la via Sursilvana H19 ha tenor il president communal Hans Peter Casutt mussà cleramain, che la varianta «Plaun Larisch» è la meglra. Ella custia il pli pauc, haja la pli pitschna pendenza, na procuria betg per dapli traffic che la via veglia en ils quartiers da Sagogn e possia vegnir bajegiada senza stuair serrar ina da las vias da colliaziun actualas.
Plaun Pigniel periclità
Tenor ils plans manass la via da la varianta «Plaun Larisch» il traffic gest sper la zona da recreaziun Plaun Pigniel ora. Quai n’accepta il comité da vischins «Via Precauta Sagogn» betg. Per els è quella zona da recreaziun impurtanta per Sagogn ed insatge sco l’olma dal vitg, che n’astga betg vegnir separada dal vitg entras ina via. Ord quai motiv ha il comité preschentà ina nova varianta per ina via da colliaziun, che suandass per gronda part il trassé da la via da colliaziun existenta en direcziun da Laax.
Co vinavant?
Sche quella nova proposta per ina via da colliaziun vegn anc examinada en detagl n’è betg cler. Tenor Hans Peter Casutt è la finamira da quella saira d’infurmaziun stada d'explitgar en detagl las variantas gia preschentadas e da declerar daco che la suprastanza favurisescha ina da quellas variantas. Uss stoppia la suprastanza anc discussiunar la nova proposta ed era mirar cun il chantun co vinavant.
RR actualitad 07:00