Surselva - Salvar la punt tranter Danis e Tavanasa
La nova uniun Nossa Punt a preschentà oz ses plan, co ella vul salvar la punt veglia tranter Danis e Tavanasa. La punt haja in muntada istorica e culturala. Ma era per la vita ed il purtret dals 2 vitgs saja la punt impurtanta, ha ditg la presidenta da l'uniun Nossa Punt, Rita Cathomas-Bearth.
Cun agid da la vischnanca da Breil na po l’uniun dentant betg far quint, quai tenor il president communal Clau Schlosser. Tenor l’uniun va il mantegniment sur la Protecziun da patria ed il chantun.
Investar en renovaziun
L’atun duai in’analisa da la punt esser pronta. Lura pon ins dir, con bler che la renovaziun ed il mantegniment custan propi. Entant rimna l’uniun tants commembers sco pussaivel, per avair dapli paisa tar las decisiuns.
