La sfida dals novs possessurs americans è da bain sanar, dentant era da mantegnair la gronda istorgia e tradiziun dal hotel.
Il hotel Waldhaus è gia vegnì renovà differentas giadas ils davos decennis. Adina puspè hai dà midadas u ch’ins ha bajegià insatge vidlonder. Pervi da quai datti in pau ina maschaida da stils e designs el hotel Waldhaus. Tenor Marion Minarek, managera da marketing, èsi perquai uras da far ina sanaziun totala. La tradiziun duai dentant restar.
Hotel cun gronda tradiziun
Il hotel Waldhaus guarda enavos sin ina lunga istorgia. A l’entschatta vegnivan giasts bainstants da l’entir mund a Flem per far cura. Pli tard emplenivan lura ils turists dal turissem da skis las 150 chombras da l’hotel. L’onn passà lura va il hotel Waldhaus concurs, suenter decennis da success. Mez onn pli tard cumpra in investider american il hotel per 40 milliuns francs.
Enavos tar la ragischs
Il nov possessur James Zenni vuless turnar enavos tar la tradiziun dal hotel Waldhaus, ed investescha perquai 40 milliuns francs en la renovaziun dal hotel. La finamira è d’avair ina lingia da stil clera tras l’entir bajetg. Uschia vulan ins carmalar novs giasts a Flem. Betg mo mantegnair ils giasts da tschep, mabain era esser averts per giasts da la regiun è la finamira. Quai vulessan ils possessurs cunzunt cuntanscher cun purschidas culinaricas, activitads u era events sco per exempel bals.
Cun il nov look e las differentas purschidas è Marion Minarek persvadida, ch'els pon manar il hotel ch'è ì l’onn passà concurs enavos sin la via da success.