Il Center da sport e cultura (CSC) a Mustér è vegnì construì 1980/81. Uschia na fai betg smirvegliar che quests stabiliments dovran ina sanaziun.
Tenor il plan da finanzas è la sanaziun dentant prevesida pir per il 2018. Tenor il president da la cumissiun da manaschi dal CSC, Roger Tuor, ston las fatschadas nord e vest da la halla da gimnastica dentant gia ussa vegnir sanadas. La raschun è ch’ins ha chattà bulieus vid las paraids en il locals da la protecziun civila. Locals, che vegnan duvrads per dar suttetg a champs.
Per pudair duvrar ils locals per l’enviern sajan vegnidas fatgas remeduras en l’intern. Ma quai gidia be a curta vista. Tras ils mirs tira anc adina viaden aua e sch’il bulieu returna puspè possia quel era sa derasar tras la ventilaziun en tut ils locals.
Donn finanzial e da reputaziun
Cun las localitads da la protecziun civila recaltgescha il CSC annualmain entradas da var 170’000 francs. Per ils proxims onns possian ins schizunt augmentar questa summa sin passa 200’000 francs, declera Roger Tuor. Perquai na possian ins betg sa prestar da stuair serrar ils locals. Quai fiss in donn finanzial sco er in donn da reputaziun.
Duas variantas
Perquai suttametta la suprastanza ussa al cussegl da vischnanca duas variantas. La varianta favurisada è quella da sanar l'entira fatschada. Vul dir, sanar il mir ch'è sut terra per ch'el tegnia puspè davent l'aua e la part sur terra cun isolar quella tenor ils standards actuals e far ina nova grunda. Custs: 280'000 francs.
Tar la segunda varianta vegn la part sut terra sanada tuttina. Mo tar la part sur terra datti ina differenza: là vegnan fatgas mo lavurs da cosmetica per che las duas fatschadas fetschian opticamain puspè ina buna parita. Quella varianta è calculada cun 215'000 francs.
Nagina influenza sin manaschi
Ina sanaziun anticipada da questas duas fatschadas avess tenor Roger Tuor naginas consequenzas per la sanaziun totala dals edifizis. Quella part saja lura simplamain gia sanada e na stoppia betg vegnir tutgada en pli. Per il manaschi sco tal avess quai era naginas consequenzas.
La sanaziun succedia d’ordadora uschia ch’ins possia vinavant duvrar las localitads. Sch'il cussegl da vischnanca approvescha il credit ed i na dat nagin referendum quinta Tuor che las lavurs èn a fin sin la stagiun da stad.
Credit per maisas e sutgas
Il cussegl da vischnanca ha era anc da decider davart in credit per remplazzar las maisas e las sutgas dal CSC. Era questas mobiglias èn passa 35 onns veglias ed han gia surpassà ils megliers onns. Per las 900 sutgas e 150 maisas vegn dumandà in credit da 196’000 francs.