L’emprima giada ch’i vegn documentà ch’i dat vignas a Sagogn è l’onn 765 en il testament da Tello. En quest descriva la baselgia da S. Columban, cun il bain puril e las vignas. Cura che Aron Candrain da Sagogn ha udì quai èsi stà cler ch’el veglia puspè plantar ivas a Sagogn ed uschia ha el prendì a tschains il prà nua ch’igl è probabel gia vegnì racoltà ivas avant passa 1250 onns.
L’emprima racolta è ida a la malura
Plantà è vegnida la sorta Solaris. In'iva che madira baud ed è resistenta cunter malsognas. Suenter che las vespras han maglià l’emprim onn las ivas, han Aron Candrian e ses bab Hannes mess las ivas en in satg da taila avant ch’ellas madiran per uschia tegnair davent las vespras. Uschia hai lura dà l’onn passà l’emprima racolta che ha pudì vegnir manada en il Signuradi per laschar producir vin. En tut 166 buttiglias vin alv ha quai dà.
Vin na pon ins betg cumprar
Era sch’i vegniva fatg gia avant tschientaners a Sagogn vin n’è il lieu betg en il cataster da vignas. Quest register definescha nua ch’ins po avair vignas e dastgar far vin. Sch’il lieu n’è, sco Sagogn, betg en quest cataster na dastga la vigna betg esser pli gronda che 400 meters quadrat ed il vin producì na dastga betg vegnir vendì.
Aron Candrian na vul sez betg producir dapli vin a Sagogn, damai ch’el producescha cun ses frar e ses geniturs gia vin en Spagna. Ma el spera che autras persunas hajan gust da producir vin e ch’ins possia lura uschia mirar che Sagogn vegni en il cataster da vignas.
L’onn passà ha il clima sitg e chaud da Sagogn procurà ch’i ha dà 166 buttiglias vin cun il num «Resvegl».
TR Telesguard 17:40