Sumvitg: provediment d’aua vegn sanà per 6 milliuns francs

Mesemna, ils 24 da matg, decida la vischnanca da Sumvitg a la radunanza communala d'in credit brut da 6 milliuns francs. La vischnanca sto sanar ils provediments d’aua da las fracziuns Sumvitg/Sogn Benedetg e Cumpadials /Clavadi.

Laschar ir video «Sis milliuns francs per las lingias d'aua»

Sis milliuns francs per las lingias d'aua

3:49 min, Telesguard dals 19.5.2017

Ils bajetgs e stabiliments dal provediment d’aua da Murtès èn vegnids construids ils onns 1962/63. Oz n'adempleschan quels betg pli las prescripziuns da qualitad.

Lingias d'aua fan ruina

Las lingias d’aua fan ruina ed han rusnas ubain ruttadiras, en la chombra d’aua a Murtès èn las armaturas da ruina. Sche quai ha blera aua lura vegn l’entira chombra inundada. En la staziun da reducziun da la pressiun e da repartiziun a Surseivs èn las apparaturas era da ruina e mo per part pli en funcziun. L’enviern èsi era grev da cuntanscher quest stabiliment.

Remplazzar apparaturas

Ils reservuars da Sumvitg e Cumpadials han problems sumegliants. Ils mirs en la chombra cun las apparaturas èn fitg umids a partir da la primavaira fin l’atun. Las apparaturas han passa 50 onns e stuessan vegnir remplazzadas.
Perquai vegnian tut ils indrizs e las lingias d’aua remplazzadas, sco l’inschigner Walter Deplazes il responsabel dal project ha ditg.

Il project dura quatter onns

Il project vegn uss realisà en pliras etappas entaifer ils proxims quatter onns. Custà vegn l'entir project 6 milliuns francs. Quai saja blers daners, accentuescha il president da vischnanca da Sumvitg Armin Candinas. La vischnanca stuess surpigliar ina mesadad da questa summa, l’autra vegn finanziada da la Confederaziun, dal chantun e da la polizia da fieu chantunala. Per che la vischnanca possia sminuir sia cumpart veglian els empruvar da recaltgar daners dad instituziuns sco per exempel dal Padrinadi per vischnancas da muntogna.

Votaziun a l'urna

Suenter che la radunanza communala ha decidì ils 24 da matg vegn il project suttamess a la votaziun a l’urna ils 25 da zercladur.

RR actualitad 17:00