Siglir tar il cuntegn

Header

cuntegn

Surselva Temp da ruaus: Mo paucs avieuls sgolan anc

Dis miaivels e dis da favugn èsi pussaivel ch’intgins avieuls èn anc sin viadi. Da temperaturas da tschintg grads fetschian els quai, surtut sch’els dovrian aua, di il president da l’Uniun grischuna d’apiculturs Andreas Pfister.

In problem saja quai dentant sch’i plova e vegnia fraid, cura ch’ils avieuls sgolian. Alura stoppian ils blers murir. Mo en general na chaschunia l’aura, era il fraid, betg problems ad in pievel vital. I saja meglier sch’i saja fraid e ruassaivel l’enviern e che las temperaturas na sa midian betg. Sch’i vegnia chaud pudess la regina vegnir activa e metter ovs, di Andreas Pfister. Ils avieuls stuessan tgirar il cuaditsch e sch’i vegniss alura puspè fraid na pudessan els betg tegnair ina temperatura da var 35 grads.

Avieuls na dorman betg l'enviern

audio
Mezdi: Uschè ditg ch’ils avieuls restan en staup, èn els bain protegids
ord Actualitad dals 28.11.2016.
laschar ir. Durada: 2 minutas 54 Secundas.

Ils avieuls ruaussan pia uss. Mo els na dorman betg l’enviern, els stattan eri e na sa movan; il sulet ch’els fetschian saja da tegnair in pau a chaud la barlocca ubain là nua che la regina è. Era per l’apicultur è la gronda part da la lavur terminada; quai ch’el stoppia anc far saja da tractar ils avieuls encunter la varroa, di il president da l’Uniun grischuna d’apiculturs.

Buna stad

La stad passada saja stada buna per ils avieuls, ha aschuntà Andreas Pfister. Mo en regiuns bassas haja la plievgia chaschunà difficultads il matg.

Andreas Pfister ha da quai da 30 pievels. El ha repartì els en plirs lieus, in dals lieus è a Pitgmun sur Sedrun sin 1'500 meters sur mar.

RR actualitad 11:00

Artitgels legids il pli savens