Siglir tar il cuntegn

Header

cuntegn

Surselva Trofea Péz Ault: I dovra cundiziun per 14 km

Marco Schmed da Mustér prenda gia part per la 7avla giada a questa cursa cun skis da turas. Mo questa giada èsi ina premiera per el: El ha elegì la varianta greva cun 14 km.

L’um da 40 onns di ch’el fetschia adina puspè sport. Il davos temp ha el era trenà cun ils skis da turas. Ina part da las preparativas èn era las pels dals skis. Sche la naiv tatga, alura unschia el las pels, di Marco. I saja era bun da guardar co las temperaturas èn. Vers la fin da mars èsi savens chaud, e perquai saja quai bun da parter marvegl la damaun. En cas ch’el haja ina crisa, giaja el pli plaun. Mo star airi na saja betg bun, alura vegnia mo mender.

Betg ir ordavant a l'entschatta

Sin il tschancun da la Trofea Péz Ault datti posts nua ch’ils curriders survegnan in pitschen refrestg. Quai po gidar, perquai ch’i dovra blera cundiziun dad ir da ca. 1'800 sin quasi 2'900 meters sur mar.

Curriders en acziun
Legenda: Curriders en acziun RTR

Curridras e curriders partan il medem mument. Marco Schmed di, ch’el na giaja betg ordavant a l’entschatta; el laschia ir la gruppa ed observia alura, tge ritmus ch’ella ha. Pir cura ch’el vesia il piz Ault emprovia el - sche pussaivel - dad ir pli spert. Mo quai dependia era da la furma dal di. Sia finamira è da vegnir tras; ed impurtant èsi per el era ch’el possia giudair la Trofea Péz Ault.

RR actualitad 07:00

Artitgels legids il pli savens