Surselva - Trun: 50 onns dapi la lavina da Cartatscha

Legenda: La lavina da Cartatscha (approximativ) tenor descripziuns da perditgas. Grafica RTR

L’onn 1967, ils 21 da mars la notg da las 1:15, è la lavina da Cartatscha ida a val. I aveva bischà entaifer in di passa 1 meter e la situaziun era precara. Che la fracziun da Cartatscha pudess esser en privel n'ha nagin supponì.

La trista nova la damaun dils 21 da mars: 3 morts - in bab e ses dus figls - en la lavina. Ina chasa e plirs clavads destruids e da quai da 30 chaus biestga medemamain sut la lavina.

Nagin avess cret

Ch’i ha tutgà il vitget da Cartatscha è sta ina surpraisa per l'entira populaziun. Ins enconuscheva gia differentas lavinas, uschia 1962 quella da Punteglias u la lavina da platta cotschna che datescha dal 1720. A Cartatscha, gist sper la chasa dals Decurtins ch'è vegnida destruida da la lavina, steva fin ils onns 1944 ina chasa che valeva sco ina da las pli veglias da la vischnanca da Trun.

Sco quai che Gieri Schmed, il biadi dal possessur da questa chasa, ha ditg, era quella chasa 450 onns veglia. Suenter ch'ella è brischada giu han ins construì ina chasa nova var 11 meters pli encunter la val Quadra. E gist quels 11 meters èn la finala stads en la fallada direcziun.

audio

Mezdi: Trun: 50 onns lavina da Cartatscha

03:53 min, ord Actualitad dals 21.03.2017.

laschar ir. Durada: 3 minutas 53 Secundas.

Segirar il vitg

Sco consequenza da la lavina dal 1967 han ils da Trun entschet cun grondas investiziuns per la segirtad dal vitg. A Cartatscha sez è vegni scumandà d'abitar durant l'enviern, quai è anc oz uschia. Il vitg è vegnì segirà cun lavineras e cun rempars. En tut ha la vischnanca da Trun investì 20 milliuns francs en questa segirtad. Trun sez ha dentant stuì pajar mo 5% da quella summa, la Confederaziun ed il chantun han pajà il rest.

1 / 6

Legenda: Trun schai en in fop nua che la lavina vegn sco chanalisada. En il chantun giudim dretg il rempar. RTR, Linus Livers

2 / 6

Legenda: Gion Vincenz sa regorda dal 1967, cura ch'el era capitani da pumpiers a Zignau. RTR, Linus Livers

3 / 6

Legenda: Gieri Schmed ha pers ses tat e dus da ses augs en la lavina da Cartatscha. RTR, Linus Livers

4 / 6

Legenda: Gieri Schmed declera a Gion Vincenz co el ha passentà ses emprims 8 onns da la vita en questa chasa. RTR, Linus Livers

5 / 6

Legenda: Gist en quest plaz avevan ins chattà ina da las trais baras en la lavina. RTR, Linus LIvers

6 / 6

Legenda: Era suenter 50 onns stattan las ruinas anc. RTR, Linus Livers

RR actualitad 12:00